மத்திய அறிவியல் மற்றும் தொழில்நுட்பம் (தனிப்பொறுப்பு), பிரதமர் அலுவலகம், பணியாளர், பொதுமக்கள் குறைகள், ஓய்வூதியம், அணுசக்தி மற்றும் விண்வெளித் துறை இணை அமைச்சர் டாக்டர் ஜிதேந்திர சிங், பிரிக்ஸ் (பிரேசில், ரஷ்யா, இந்தியா, சீனா மற்றும் தென்னாப்பிரிக்கா)அறிவு, படைப்பாற்றல் மற்றும் கண்டுபிடிப்பு பொருளாதாரத்தால் உந்தப்பட்ட அதிக மக்கள்தொகை கொண்ட சந்தையாக உலகளாவிய முக்கியத்துவத்தை தொடர்ந்து தக்க வைத்திருக்க வேண்டும் என்று கூறினார்.
தென்னாப்பிரிக்காவின் கோபெர்ஹாவில் நடைபெற்ற 11 வது பிரிக்ஸ் எஸ்.டி.ஐ (அறிவியல், தொழில்நுட்பம் மற்றும் புதிய கண்டுபிடிப்புகள்) அமைச்சர்கள் கூட்டத்தில் “எஸ்.டி.ஐ முன்னுரிமைகள் மற்றும் கொள்கைகள் புதுப்பிப்புகள்” குறித்த மெய்நிகர் ஊடகம் மூலம் உரையாற்றிய டாக்டர் ஜிதேந்திர சிங், உள்ளூர் பொருளாதாரங்களுக்கு ஏற்ற கூட்டு அறிவியல் மற்றும் தொழில்நுட்பம் தீர்வுகள் மூலம் பிராந்திய அறிவியல்-ஆராய்ச்சி சவால்களை அடையாளம் காணவும் ஆராயவும் இந்த குழு ஒத்துழைக்க முடியும் என்றார்.
சுகாதாரம், விவசாயம், நீர், கடல் அறிவியல், புதுப்பிக்கத்தக்க எரிசக்தி, உயிரி தொழில்நுட்பம், மேம்பட்ட டிஜிட்டல் தொழில்நுட்பங்கள் மற்றும் சுற்றுச்சூழல் போன்ற துறைகளில் அறிவியல் மற்றும் தொழில்நுட்ப ஒத்துழைப்பை விரிவுபடுத்த டிஜிட்டல் மற்றும் தொழில்நுட்ப கருவிகள் உள்ளிட்ட புதுமையான மற்றும் உள்ளடக்கிய தீர்வுகளை உருவாக்குவதில் பிரிக்ஸ் முயற்சிகளுக்கு இந்தியா ஆதரவளிக்கும். நிலையான வளர்ச்சியை ஊக்குவிப்பதற்கும், அனைவருக்கும் உலகளாவிய பொதுப் பொருட்களுக்கான சமமான அணுகலை எளிதாக்குவதற்கும் இந்தியா ஆதரவளிக்கும் என்று டாக்டர் ஜிதேந்திர சிங் கூறினார். அறிவியல், தொழில்நுட்பம் மற்றும் புத்தாக்கத் துறையில் பிரிக்ஸ் ஒத்துழைப்பை மேம்படுத்த இந்தியா நெருக்கமாக பணியாற்ற எதிர்பார்க்கிறது என்று அவர் கூறினார்.
“ஜெய் ஜவான், ஜெய் கிசான், ஜெய் விக்யான் மற்றும் ஜெய் அனுசந்தன்” ஆகிய தலைப்புகளில் பிரதமர் திரு நரேந்திர மோடி வலியுறுத்திய மந்திரத்தின்படி, உலக அளவில் ஆராய்ச்சி மற்றும் கண்டுபிடிப்பு நிலப்பரப்பில் தனது தடத்தை நிலைநிறுத்த இந்தியா சீராக முன்னேறி வருகிறது என்று டாக்டர் ஜிதேந்திர சிங் கூறினார். இது மகத்தான வெற்றிக்கு வழிவகுத்துள்ளது. உலகளாவிய கண்டுபிடிப்பு குறியீட்டெண் (ஜிஐஐ) 2022 இன் படி, 2015 ஆம் ஆண்டில் 81வதுஇடத்தில் இருந்த இந்தியா இப்போது 40வதுஇடத்திற்கு முன்னேறியுள்ளது. என்.எஸ்.எஃப் தரவுத்தளத்தின்படி அறிவியல் வெளியீடுகளின் எண்ணிக்கையின் அடிப்படையில் இந்தியா முதல் 3 நாடுகளில் ஒன்றாக உள்ளது என அமைச்சர் கூறினார்.
மோடி அமைச்சரவையால் அங்கீகரிக்கப்பட்ட தேசிய ஆராய்ச்சி அறக்கட்டளை அறிவியல் ஆராய்ச்சிக்கு சமமாக நிதியளிப்பதையும், அதிக தனியார் பங்கேற்பு இருப்பதையும் உறுதி செய்யும் என்று டாக்டர் ஜிதேந்திர சிங் கூறினார். இதற்காக என்.ஆர்.எஃப் நிறுவனங்களை ஆய்வு மற்றும் மேம்படுத்துதல் துறையில் முதலீடு செய்ய தூண்ட வேண்டும். நாங்கள் ஒரு தனித்துவமான பொது மற்றும் தனியார் கூட்டாண்மை (பிபிபி) நிறுவனத்தைத் திட்டமிட்டுள்ளோம், இதற்காக ரூ .36,000 கோடி ஆராய்ச்சி நிதி தனியார் துறையிலிருந்து வருகிறது, பெரும்பாலும் தொழில்துறையிலிருந்து வருகிறது, அதே நேரத்தில் தொழில்துறையின் அதிக பங்கேற்பை உறுதி செய்வதற்காக அரசாங்கம் இதற்காக ரூ .14,000 கோடியை ஒதுக்கும் என்று அமைச்சர் தெரிவித்தார்.
திவாஹர்