அறிவியல் மற்றும் தொழில்நுட்பத் துறை ‘விஞ்ஞான் தாரா’ திட்டத்திற்கு மத்திய அமைச்சரவை ஒப்புதல்.

பிரதமர் திரு. நரேந்திர மோடி தலைமையில் இன்று கூடிய மத்திய அமைச்சரவை, அறிவியல் மற்றும் தொழில்நுட்பத் துறையின் ஒருங்கிணைந்த மத்திய துறைத் திட்டமான ‘விஞ்ஞான் தாரா’ என்ற பெயரில் இணைக்கப்பட்ட மூன்று குடைத் திட்டங்களைத் தொடர ஒப்புதல் அளித்தது.

இத்திட்டம் மூன்று பரந்த கூறுகளைக் கொண்டுள்ளது:

1.         அறிவியல் மற்றும் தொழில்நுட்பம் நிறுவன மற்றும் மனித திறன் மேம்பாடு,

2.         ஆராய்ச்சி மற்றும் மேம்பாடு

3.         கண்டுபிடிப்பு, தொழில்நுட்ப மேம்பாடு மற்றும் வரிசைப்படுத்தல்.

2021-22 முதல் 2025-26 வரையிலான 15-வது நிதிக்குழு காலத்தில் ஒருங்கிணைந்த திட்டமான ‘விஞ்ஞான் தாரா’ திட்டத்தை செயல்படுத்த உத்தேசிக்கப்பட்ட ஒதுக்கீடு 10,579.84 கோடி ரூபாயாகும்.

திட்டங்களை ஒரே திட்டமாக இணைப்பது நிதி பயன்பாட்டில் செயல்திறனை மேம்படுத்தும் மற்றும் துணை திட்டங்கள் / திட்டங்களுக்கு இடையே ஒத்திசைவை ஏற்படுத்தும்.

நாட்டில் அறிவியல், தொழில்நுட்பம் மற்றும் கண்டுபிடிப்பு சுற்றுச்சூழல் அமைப்பை வலுப்படுத்துவதற்காக அறிவியல் மற்றும் தொழில்நுட்ப திறன் மேம்பாடு மற்றும் ஆராய்ச்சி, கண்டுபிடிப்பு மற்றும் தொழில்நுட்ப வளர்ச்சியை ஊக்குவிப்பதே ‘விஞ்ஞான் தாரா’ திட்டத்தின் முதன்மை நோக்கமாகும். இத்திட்டத்தை அமல்படுத்துவதன் மூலம், கல்வி நிறுவனங்களில் நன்கு பொருத்தப்பட்ட ஆராய்ச்சி மற்றும் மேம்பாட்டு ஆய்வகங்களை வளர்ப்பதன் மூலம் நாட்டின் அறிவியல் மற்றும் தொழில்நுட்ப உள்கட்டமைப்பை வலுப்படுத்த முடியும்.

அடிப்படை ஆராய்ச்சி, நிலையான எரிசக்தி, நீர் போன்றவற்றில் மொழிபெயர்ப்பு ஆராய்ச்சி மற்றும் சர்வதேச இருதரப்பு மற்றும் பலதரப்பு ஒத்துழைப்பு மூலம் கூட்டு ஆராய்ச்சி போன்ற துறைகளில் ஆராய்ச்சியை மேம்படுத்த இத்திட்டம் முயற்சிக்கிறது. அறிவியல் மற்றும் தொழில்நுட்ப நிலப்பரப்பை வலுப்படுத்துவதற்கும், முழுநேர சமமான (எஃப்.டி.இ) ஆராய்ச்சியாளர்களின் எண்ணிக்கையை மேம்படுத்துவதை நோக்கி நாட்டின் ஆராய்ச்சி மற்றும் மேம்பாட்டு தளத்தை விரிவுபடுத்துவதற்கும் முக்கியமான மனிதவள தொகுப்பை உருவாக்குவதற்கும் இது பங்களிக்கும். அறிவியல், தொழில்நுட்பம் மற்றும் புத்தாக்கம் ஆகியவற்றில் பாலின சமத்துவத்தை கொண்டு வருவதை இலக்காகக் கொண்டு, அறிவியல் மற்றும் தொழில்நுட்பத் துறையில் மகளிரின் பங்களிப்பை அதிகரிக்க கவனம் செலுத்தும் நடவடிக்கைகள் மேற்கொள்ளப்படும். பள்ளி அளவில் தொடங்கி உயர்கல்வி வரை அனைத்து நிலைகளிலும் புதுமைகளை ஊக்குவிப்பதற்கான அரசின் முயற்சிகளுக்கு இந்தத் திட்டம் வலு சேர்க்கும். கல்வியாளர்கள், அரசு மற்றும் தொழிற்சாலைகளுக்கு இடையேயான ஒத்துழைப்பை அதிகரிக்க குறிப்பிடத்தக்க ஆதரவு வழங்கப்படும்.

‘விஞ்ஞான் தாரா’ திட்டத்தின் கீழ் முன்மொழியப்பட்ட அனைத்து திட்டங்களும் வளர்ந்த பாரதம் 2047-ன் தொலைநோக்கை நனவாக்கும் நோக்கில் அறிவியல் மற்றும் தொழில்நுட்பத் துறையின் 5 ஆண்டு இலக்குகளுடன் இணைக்கப்படும். இந்த திட்டத்தின் ஆராய்ச்சி மற்றும் மேம்பாட்டு கூறு அனுசந்தன் தேசிய ஆராய்ச்சி அறக்கட்டளையுடன் ஒத்துப்போகும். தேசிய முன்னுரிமைகளுக்கு ஏற்ப உலக அளவில் நடைமுறையில் உள்ள அளவுகோல்களை பின்பற்றி இத்திட்டத்தை செயல்படுத்த வேண்டும்.

பின்னணி:

அறிவியல் மற்றும் தொழில்நுட்பத் துறை நாட்டில் அறிவியல் & தொழில்நுட்ப நடவடிக்கைகளை ஒழுங்கமைத்தல், ஒருங்கிணைத்தல் மற்றும் மேம்படுத்துவதற்கான ஒருங்கிணைப்புத் துறையாக செயல்படுகிறது. நாட்டில் அறிவியல், தொழில்நுட்பம் மற்றும் புதுமைப் படைப்புகளை ஊக்குவிப்பதற்காக அறிவியல் மற்றும் தொழில்நுட்பத் துறையால்  மேற்கூறிய மூன்று மத்திய துறைகளின் ஒருங்கிணைந்த திட்டங்கள் செயல்படுத்தப்பட்டு வருகின்றன..

திவாஹர்