மத்திய சாலைப் போக்குவரத்து மற்றும் நெடுஞ்சாலைத் துறை அமைச்சர் திரு நிதின் கட்கரி உத்தரப் பிரதேச மாநிலம் பல்லியாவில் உள்ள சித்படா கிராமத்தில் 6500 கோடி முதலீட்டில் 7 தேசிய நெடுஞ்சாலைத் திட்டங்களை இன்று தொடங்கி வைத்தார்.
நிகழ்ச்சியில் பேசிய ஸ்ரீ கட்கரி, பல்லியா இணைப்பு விரைவுச்சாலை அமைப்பதன் மூலம் லக்னோவிலிருந்து பூர்வாஞ்சல் விரைவுச்சாலை வழியாக நான்கரை மணி நேரத்தில் பாட்னாவை அடைய முடியும் என்றார். பல்லியா முதல் பக்சர் வரை அரை மணி நேரத்திலும், பல்லியா முதல் சாப்ரா வரை ஒரு மணி நேரத்திலும், பல்லியாவிலிருந்து பாட்னாவுக்கு ஒன்றரை மணி நேரத்திலும் சென்றடையலாம் என்றார். கிரீன்ஃபீல்ட் நெடுஞ்சாலை அமைப்பதன் மூலம், கிழக்கு உத்தரபிரதேசம் பீகாரில் உள்ள சாப்ரா, பாட்னா, பக்சர் ஆகியவற்றுடன் சிறந்த இணைப்பைப் பெறும்.
பல்லியா விவசாயிகளின் காய்கறிகள் லக்னோ, வாரணாசி மற்றும் பாட்னா மண்டிகளுக்கு எளிதில் சென்றடையும் என்று அமைச்சர் கூறினார். காய்கறி உற்பத்தி செய்யும் விவசாயிகள் இந்த விரைவுச் சாலையின் மூலம் வாரணாசி, காஜிபூர் மற்றும் ஹல்தியா ஆகிய மூன்று மல்டி மாடல் டெர்மினல்களின் நேரடிப் பயனைப் பெறுவார்கள் என்றார்.
130 கோடி செலவில் சந்தௌலியில் இருந்து மொஹானியா வரை கிரீன்ஃபீல்ட் சாலை அமைக்கப்படுவதால் உத்தரபிரதேசத்தில் உள்ள சந்தௌலி மற்றும் பீகாரின் கைமூர் மாவட்டம் டெல்லி-கொல்கத்தா ஜிடி சாலை வழியாக இணைக்கப்படும் என்று ஸ்ரீ கட்கரி கூறினார். சைத்பூர் முதல் மர்தா வரையிலான சாலை அமைப்பதன் மூலம், சைத்பூர் வழியாக வாரணாசியிலிருந்து மௌவுக்கு நேரடி இணைப்பு கிடைக்கும் என்றார். மாநிலத்தின் பிற நகரங்களுடனான சிறந்த இணைப்பு காரணமாக, மாநிலத்தின் பொருளாதார மற்றும் சமூக நிலை மேம்படும், அதே போல் அசம்கர் மாவட்டத்தின் பின்தங்கிய பகுதிகளும் புதிய இணைப்பைப் பெறும் என்றார்.
எம் . பிரபாகரன்